TONECHO DE REBORDECHAO

Breogán Riveiro

Rebordechao é unha aldea que queda alá por... chegando á... O certo é que non é doado atopar Rebordechao, nen sequera aínda que a busques. Neste lugar perdido vive Tonecho, o neno máis bo e máis guapo, o mellor de todos, porque en Rebordechao... non quedan máis nenos ca el.

No relato cóntanos moitas cousas: como é a vida na aldea, como é a escola unitaria na que a súa mestra Sabela lle aprende cousas que non veñen nos libros, a súa amizade con Kevin... E ademais, coñeceremos os seus avós, que como di Tonecho son coma nenos: discuten polas cousas máis insólitas pero cun aquel que demostra o que é o verdadeiro amor.

Na aldea Tonecho non ten tempo de aburrirse. A paisaxe é fermosa, tanto se neva como se vai sol, e cando chove gústalle quedar a carón da lareira e escoitar os milleiros de historias que saben os avós. Ademais, hai casas baleiras nas que entrar, froitas que roubar e corredoiras que percorrer.

Precisamente a afección de Tonecho a deambular pola aldea será a orixe dunha emocionante aventura e dunha descuberta relacionada coa arrepiante historia dun lobishome que viviu por aquelas terras. Ao final todo quedará en nada, pero, vaia susto que nos deu o Tonecho!

No IES de Becerreá, no club de lectura leron este libro e entrevistaron a Breogán Riveiro. Se queres ler a entrevista pica aquí.

Usha

María Reimóndez

(N-869-REI-ush)
Uxía (Usha) escribe o relato da súa estanza en Devastana, unha vila do estado de Karnataka, na India. A rapaza galega, que acompaña a súa nai, membro dunha ONG, rememora a vida cotiá alá na India, un país moi diferente do noso. Alí fai amigos como Lakshmi e Deepak, aprende canarés, coñece novos costumes e lendas, aprende que alí o seu nome significa a primeira luz do mencer...

Usha co seu relato dános a coñecer a forma de vida dun país tan diferente ao noso como é a India e fainos comprender e coñecer realidades moi diferentes da nosa. Queres buscar datos na wikipedia en canarés? Que che pareceu, fácil non? Tamén podes ver algunhas fotos dos rangolis, a árbore neem, algún sari, a deusa Saraswati, algún templo..., e ata hai unha de María Reimóndez poñendo un sari diante dos rapaces e rapazas dun instituto de Gondomar. Non sei se poderá algún día vir ao noso, pois está moi ocupada traballando na súa ONG.

O cazador de estrelas
(N860/GÓM/caz)
Ricardo Gómez

Bachir é un neno enfermo que vive nun campamento de refuxiados saharauis. Unha doenza pulmonar obrígalle a permanecer na súa tenda. Non sabe ler nin escribir e abúrrese cos libros de imaxes que lle leva súa irmá. Descobre que a través dos sons que lle chegan do exterior pode enterarse de todo o que pasa no campamento. Entretense escoitando estas voces e imaxinando o que transcorre fóra da súa tenda. Unha noite escoita o ruído duns pasos e coñece a un vello que lle vai contar a historia do seu pobo e a posibilidade de curarse da súa enfermidade.

Para facer o traballo podedes picar aquí e iredes á páxina da wikipedia con información sobre o Sahara en galego. Tamén podes ver un pequeno vídeo nun campamento saharauí dunha campaña de apoio a este pobo. O IES As Mariñas de Betanzos, no que tamén leron o libro, ten uns xogos sobre o Sahara, podes probar a xogar picando aquí.

O cocho de carreiras Rudi Fuciños

Timm, Uwe

A historia dun cocho que un día lle toca nunha tómbola a Zuppi, unha nena coa que Rudi coñecerá a súa verdadeira vocación. A familia de Zuppi está formada por un pai exiptólogo en paro, unha nai profesora e tres fillos. A entrada do pequeño cocho na familia vai provocar alegrías e desgustos, enfados e aventuras. De primeiras resulta moi difícil convencer a un caseiro de que se pode ter un cocho na casa. Tampouco é fácil metelo na bañeira. Ao final, pasadas as incomodidades dos primeiros días, a familia acabará acomodándose a convivir co porco, aínda que o papá exiptólogo se teña que converter en vixiante dun campo de deportes. Alí nacerá a verdadeira vocación de Rudi Fuciños.

Existe unha película "Rudi, el cerdito de carreras" que aínda que ten como protagonista a Rudi conta outra historia diferente da do libro que lemos en clase.

TRES PASOS POLO MISTERIO
Agustín Fernández Paz
Este novo libro de Agustín Fernández Paz recolle tres relatos nos que a presenza do misterio ocupa un lugar central. En cada un deles unha persoa narra un suceso inquedante e inexplicable que acabou por mudar de xeito profundo a súa vida. O arqueólogo de “A serpe de pedra” conta os terribles acontecementos que, despois da escavación da Roza das Modias, acaeceron nun museo de Lugo provocados pola maldición agochada durante miles de anos baixo un monumento megalítico. O xove peregrino de “A vella foto das estrelas” relata como debido a un encontro marabilloso acaecido no Camiño de Santiago tocou o misterio da presenza terrible e marabillosa que vén coa noite chea de estrelas. O historiador de “As sombras do faro” rememora, trinta anos despois, os estraños e desacougantes sucesos, tan claros na súa memoria, da enigmática torre de Pontebranca, un faro derruído, onde se viviron experiencias terribles. Un libro que guía os nosos pasos polos camiños do misterio, da intriga e do terror.

AS AVENTURAS DE "A MAN NEGRA"
AUTOR: Hans Jürgen Press
ARGUMENTO: As aventuras de "a man negra" están protagonizadas por un grupo de amigos que á saída do colexio e durante o período de vacacións reúnense nunha base e alí poñen en marcha as súas investigacións detectivescas. O libro contén catro historias de detectives que estimulan o sentido da observación. Na primeira historia A casa misteriosa resolven un caso de falsificación de selos; na segunda O tesouro no lago Bebersee teñen que descubrir a un ladrón de xoias; na terceira O túnel dos traficantes investigan un asunto de tráfico de drogas e finalmente en Roubo no zoo axudan á policía no estraño caso do roubo de tres animais. As ilustracións son parte do texto e tamén deben ser lidas para descubrir as pistas que permitirán resolver o enigma. Vai anotando as respostas ás preguntas e ao final poderás comprobar se es un bo detective ou se debes seguir mellorando para chegar a ser un detective famoso como Sherlock Holmes.

Verano en vaqueros

Verano en vaqueros

Ann Brashares (860-BRA-ver)

Antes de salir de vacaciones, Carmen, Lena, Bridget y Tibby deciden que van a compartir un pantalón vaquero que les sienta genial a todas, y que se lo irán pasando durante el verano. Carmen se va a casa de su padre; Lena, a casa de sus abuelos en Gracia; Bridget, a un campamento de fítbol, y Tibby va a trabajar en un supermercado. Cada una va a tener mucho que contar al resto de amigas, porque va a ser un verano muy especial.

Unha novela fácil de ler e que está tendo éxito entre os lectores, especialmente entre as lectoras. Sobre este libro fíxose unha película "Uno para todas" que tamén tivo moito éxito entre a xente nova.

Anímate a lelo, vaiche gustar, e si ves que si, que está ben, avísanos e podemos conseguir a segunda parte.